Намеснік Старшыні Канстытуцыйнага Суда Н.А.Карповіч выступіла на тэму «Абаронная магутнасць беларускай арміі і патрыятызм у сучасных умовах» у Беларускім дзяржаўным эканамічным універсітэце.

Н.А.Карповіч акцэнтавала ўвагу на тым, што меры, якія прымаюцца дзяржавай па ўмацаванні абароннай магутнасці беларускай арміі ва ўмовах нарастання знешніх ваенных пагроз, грунтуюцца на нормах Канстытуцыі Рэспублікі Беларусь аб міралюбівым характары беларускай дзяржавы і абароне Рэспублікай Беларусь сваёй незалежнасці, тэрытарыяльнай цэласнасці і канстытуцыйнага ладу. Спікер адзначыла, што кожны грамадзянін – патрыёт сваёй краіны павінен садзейнічаць захаванню міру, умацаванню абароннай магутнасці дзяржавы. Ва ўсе часы вышэйшай праявай патрыятызму была гатоўнасць стаць на абарону Радзімы і свайго народа. У сучасным разуменні быць патрыётам азначае плённа працаваць для дабрабыту краіны, захоўваць яе гісторыю і нацыянальныя традыцыі, усяляк падтрымліваць яе пазітыўны вобраз і, вядома, быць гатовым годна выканаць свой свяшчэнны канстытуцыйны абавязак па абароне Рэспублікі Беларусь.

Падчас актыўнай дыскусіі было абмеркавана мноства пытанняў, закранутых у выступленні дакладчыка.

Адказваючы на пытанні ўдзельнікаў сустрэчы, Н.А.Карповіч распавяла пра дзейнасць Канстытуцыйнага Суда па разглядзе канстытуцыйных скаргаў грамадзян, пра ролю канстытуцыйнай скаргі ў развіцці нацыянальнай прававой сістэмы, пра канстытуцыйную значнасць рэалізацыі Усебеларускім народным сходам паўнамоцтва па выбранні суддзяў Канстытуцыйнага Суда. Дакладчык адзначыла, што функцыі і паўнамоцтвы судовага канстытуцыйнага кантролю складаюць цэласную сістэму зацвярджэння вяршэнства і прамога дзеяння Канстытуцыі, канстытуцыйнай законнасці, абароны гарантаваных Канстытуцыяй правоў і свабод грамадзян.

Вялікую цікавасць у студэнтаў выклікала абмеркаванне пераемнасці прынцыпаў юрыдычнай прафесіі, патрабаванняў да кампетэнцыі і асобы сучаснага юрыста, навыкаў, якія дазваляюць найбольш эфектыўна спрыяць сцвярджэнню справядлівасці і законнасці ў жыцці грамадства, паспяхова абараняць правы і інтарэсы канкрэтных грамадзян.