На пасяджэнні Канстытуцыйнага Суда Рэспублікі Беларусь 5 сакавіка 2009 г. прынята рашэнне (суддзя-дакладчык Ізотка У.П.), якое датычыцца прававога рэгулявання выплаты выхадной дапамогі пры скасаванні тэрміновага працоўнага дагавора (кантракта). Канстытуцыйны Суд устанавіў наступнае.

Кантракт з’яўляецца разнавіднасцю тэрміновага працоўнага дагавора, і пры яго скасаванні ў сувязі з парушэннем наймальнікам заканадаўства аб працы, калектыўнага або працоўнага дагавора павінна прымяняцца норма часткі трэцяй артыкула 41 Працоўнага кодэкса Рэспублікі Беларусь, якая прадугледжвае выплату выхадной дапамогі ў памеры двухтыднёвага сярэдняга заработку.

У адпаведнасці з пунктам 2 пастановы Савета Міністраў Рэспублікі Беларусь ад 2 жніўня 1999 г. № 1180 пры скасаванні кантракта з-за невыканання або неналежнага выканання наймальнікам яго ўмоў павінна выплачвацца мінімальная кампенсацыя за пагаршэнне прававога становішча работніка ў памеры трох сярэднямесячных заработных плат.

На практыцы пры скасаванні кантракта па ўказанай падставе ўзнікала пытанне аб выплаце ў гэтым выпадку толькі мінімальнай кампенсацыі або мінімальнай кампенсацыі і выхадной дапамогі.

Пленум Вярхоўнага Суда Рэспублікі Беларусь у пастанове ад 26 чэрвеня 2008 г. № 4 “Аб практыцы разгляду судамі працоўных спрэчак, звязаных з кантрактнай формай найму работнікаў” растлумачыў, што “выплата разам з мінімальнай кампенсацыяй за пагаршэнне прававога становішча работніка ў памеры трох сярэднямесячных заработных плат выхадной дапамогі ў памеры двухтыднёвага сярэдняга заработку за парушэнне наймальнікам заканадаўства аб працы, калектыўнага або працоўнага дагавора пры скасаванні кантракта не прадугледжана”.

Па меркаванню Канстытуцыйнага Суда, нявызначанасць, якая склалася ў пытаннях выплаты выхадной дапамогі і мінімальнай кампенсацыі пры скасаванні кантракта па гэтай падставе, можа быць пераадолена ўнясеннем адпаведных змяненняў і дапаўненняў у частку трэцюю артыкула 41 і частку трэцюю артыкула 48 Працоўнага кодэкса Рэспублікі Беларусь. У сувязі з гэтым Савету Міністраў Рэспублікі Беларусь прапанавана падрыхтаваць праект адпаведнага закона.