23 сакавіка 2010 г. Канстытуцыйны Суд Рэспублікі Беларусь прыняў рашэнне «Аб роўных гарантыях рэалізацыі права грамадзян на абарону ад беспрацоўя» (суддзя-дакладчык Падгруша В.В.).

У адпаведнасці з артыкулам 23 Закона Рэспублікі Беларусь «Аб занятасцi насельніцтва Рэспублікі Беларусь» беспрацоўным грамадзянам, якія спынілі працоўныя адносіны па ўласнаму жаданню, па пагадненню бакоў або працоўны дагавор з якімі спынены па шэрагу падстаў, прадугледжаных артыкуламі 42, 44 і 47 Працоўнага кодэкса, у выпадку праходжання імі падрыхтоўкі, перападрыхтоўкі, павышэння кваліфікацыі стыпендыя выплачваецца ў меншым памеры ў параўнанні з агульнаўстаноўленнымi. Артыкул 24 гэтага Закона дапускае таксама магчымасць адмовы названым грамадзянам у назначэнні дапамогі па беспрацоўю.

Канстытуцыйны Суд прызнаў, што ўказаныя заканадаўчыя палажэннi прадвызначаны фактычна характарам дзеянняў работнiка. Заканадавец не прымае да ўвагі тое, што ў аснове спынення працоўнага дагавора могуць быць акалічнасці, якія абцяжарваюць працяг работы (напрыклад, хвароба). Звальненне можа быць абумоўлена парушэннем наймальнікам заканадаўства аб працы, працоўнага дагавора (частка чацвёртая артыкулы 40 ПК), а таксама зменай уласніка маёмасці арганізацыі (пункт 11 артыкулы 47 ПК).

Паводле меркавання Канстытуцыйнага Суда, замацаваныя ў Законе палажэннi адносна пераліку падстаў спынення працоўнага дагавора з работнікам, якія ўплываюць на памер стыпендыі або на магчымасць прызначэння дапамогі па беспрацоўю, не з'яўляюцца паслядоўнымі і справядлівымі, яны не забяспечваюць гарантыі рэалізацыі права грамадзян на абарону ад беспрацоўя.

У мэтах забеспячэння рэалізацыі канстытуцыйнага прынцыпу роўнасці ўсіх перад законам, заканадаўчага замацавання магчымасцей рэалізацыі права кожнага на абарону ад беспрацоўя Канстытуцыйны Суд прызнаў неабходным у адпаведнасці з указаным рашэннем унесці ў Закон Рэспублікі Беларусь «Аб занятасцi насельніцтва Рэспублікі Беларусь» змяненнi і дапаўненні, якія датычацца ўдакладнення:

у частцы трэцяй артыкула 23 – пераліку падстаў спынення працоўнага дагавора, з прычыны якіх стыпендыя беспрацоўным прызначаецца ў меншым памеры ў параўнанні з агульнаўстаноўленным;

у абзацы другім часткі другой артыкула 24 – пераліку падстаў спынення працоўнага дагавора, з прычыны якіх беспрацоўным можа быць адмоўлена ў прызначэнні дапамогі па беспрацоўю.

Канстытуцыйны Суд прапанаваў Савету Міністраў Рэспублікі Беларусь падрыхтаваць праект адпаведнага закона і ўнесці яго ва ўстаноўленным парадку ў Палату прадстаўнікоў Нацыянальнага сходу Рэспублікі Беларусь.